Azərbaycan hər zaman Türkiyənin yanında olub və dəstəyini heç bir zaman əsirgəməyib.
Bunu Trend-ə özəl müsahibəsində Türkiyə Böyük Millət Məclisinin (TBMM) Sədri Mustafa Şentop bildirib.
O qeyd edib ki, Türkiyə və Azərbaycan iki qardaş ölkədir və biz bu hissi “Bir millət, iki dövlət” ifadəsi ilə hər zaman dilə gətiririk. Ölkələrimiz demək olar ki, hər sahədə qarşılıqlı əməkdaşlıq edirlər.
M.Şentop əlavə edib ki, müstəqilliyini elan etdikdən sonra Azərbaycanı ilk tanıyan və qardaş hesab etdiyi ölkə kimi ticari, siyasi, hərbi və digər sahələrdə əməkdaşlığı gücləndirmək Türkiyənin əsas prioritetlərindən biri olub:
“Azərbaycan xalqının ümummilli lideri Heydər Əliyevin dövründən bəri münasibətlərimiz bu şəkildə davam edib və hər zaman daha da irəli gedib. Türkiyə Prezidenti Rəcəp Tayyib Ərdoğan və Azərbaycan Prezidenti İlham Əliyevin rəhbərliyi və dəstəyi sayəsində ölkələrimiz arasında münasibətlər getdikcə inkişaf edir”.
M.Şentop qeyd edib ki, iki ölkənin parlamentləri və müvafiq komissiyaları münasibətlərimizin inkişafına böyük dəstək verir:
“Həm rəsmi münasibətlər, həm əməkdaşlıq üçün yeni imkanlar yaratmaq, həm də iş adamlarımızı bir araya gətirmək üçün birlikdə çalışırıq”.
TBMM sədri vurğulayıb ki, kritik dövrlərdə ölkələrimiz beynəlxalq platformalarda birlikdə hərəkət edir və bir-birlərini dəstəkləyirlər:
"Heç şübhəsiz Azərbaycan da eyni şəkildə Türkiyəni dəstəkləməkdədir və bunun bariz nümunəsi ölkələrimiz arasında olan iqtisadi və digər münasibətlərin səviyyəsidir. Azərbaycan və Türkiyə beynəlxalq əhəmiyyətli enerji layihələri üzrə əməkdaşlıq edir. Azərbaycan da hər zaman Türkiyənin yanında olub və bu sahədə dəstəyini heç bir zaman əsirgəməyib”.
tv713.az