Siyasət ictimai və mənəvi bir vəzifə olduğu kimi, həm də cəsarət tələb edir.
Bəzən siyasətçiləri tək, bəzən isə başqa şəxslərin müşayiətində görürük. Xüsusilə də siyasi proseslərin aktiv olduğu, seçki və digər bu kimi kütləviliyin yaşandığı zamanlarda siyasətçilərin ətrafında onları qoruyan insanları görmək mümkündür.
Maraqlıdır, Azərbaycanda hansı siyasətçilərin mühafizəçisi var? Onlara maaş ödənilirmi, yoxsa könüllülük əsasında işləyirlər?
Cebhe.info siyasətçilərə bu sualla müraciət edib.
Azərbaycan Xalq Cəbhəsi Partiyasının (AXCP) sədri Razi Nurullayev mühafizəçiyə ehtiyac duymadığını deyib:
“Mühafizəçim yoxdur. Mühafizəçiyə ehtiyacım da yoxdur”.
Müsavat Partiyasının başqanı Arif Hacılı da mühafizəçisinin olmadığını deyib:
“Mənim mühafizəyə ehtiyacım yoxdur”.
Vətəndaş və İnkişaf Partiyasının (VİP) sədri Əli Əliyev isə sualımıza özünəməxsus cavab verib:
“Mənim mühafizəçim Allahdır”.
Azərbaycan Demokrat Partiyasının (ADP) sədri Sərdar Cəlaloğlu da mühafizəçisinin olmadığını deyib:
“Mənim mühafizə komandam yoxdur”.
AĞ Partiya başqanı Tural Abbaslı isə bəzən mühafizəyə ehtiyac duyduğunu deyib:
“Əvvəlcədən onu qeyd edim ki, mənim heç bir mühafizəçim yoxdur. Çünki hələlik buna xüsusi bir ehtiyacım da yoxdur. Odur ki, heç kimə də bu işinə görə məvacib vermirəm. Ancaq bəzən elə dönəmlər olub ki, mühafizəyə ehtiyacımız olub. Bu da əsasən bizə qarşı ola biləcək təxribatlarla bağlıdır. Belə hallarda isə ən yaxın dostlarım bu işi üzərlərinə götürüblər. Düşünürəm ki, bu işdə mənəvi bağlılıq olmasa, mühafizə işi də effektiv olmaz. Odur ki, könüllü mühafizəni məvacibli mühafizədən effektiv hesab edirəm. Şükür, hələlik belə bir ehtiyacım yoxdur”.