Ölkədə fəaliyyət göstərən bir qrup KİV nümayəndəsinin Azərbaycan Respublikasının Prezidenti cənab İlham Əliyevə müraciəti ünvanlanıb.
Tv 713. az saytı da həmin müraciətə imza atdığını bildirir və mətni təqdim edir.
Hörmətli cənab Prezident!
Azərbaycan dövləti və xalqı 2020-ci il 44 günlük Vətən müharibəsində son bir əsrlik tarixinin ən böyük Zəfərinə imza ataraq, işğal altında olan ərazilərimizi azad etməklə, dünyanın qalib ölkələri siyahısında öz layiqli yerini tutmağın böyük qürurunu yaşamaqdadır. Sizin bilavasitə rəhbərliyiniz altında və Xalq-Ordu vəhdətinin ən yüksək səviyyədə təşkili sayəsində möhtəşəm qələbə qazanan Azərbaycan bununla Avrasiya məkanında son 40 ildə ərazi bütövlüyünü məhz hərbi yolla bərpa etmiş ilk ölkə kimi tarixə öz adını yazdırdı.
Əlbəttə, Vətən müharibəsində böyük Zəfərin əldə olunması itkisiz başa gəlmədi və minlərlə qəhrəman soydaşımız bu yolda canından keçərək şəhidlik zirvəzinə ucaldı, eyni zamanda, çox sayda hərbçimiz döyüşlərdə yaralanaraq sağlamlığını itirdi.
Qazanılan bu misilsiz qələbə Azərbaycanın yerləşdiyi coğrafiyada yeni reallıqlar yaratmaqla yanaşı, həm də ölkəmiz üçün tamamilə yeni bir mərhələyə keçidlə əlamətdar oldu. Bu çərçivədə işğaldan azad olunmuş ərazilərimizdə genişmiqyaslı bərpa-quruculuq işlərinə başlanıldığı və təqribən ilyarım müddətində nəhəng işlərin həyata keçirildiyi xüsusi qeyd edilməlidir. Haqqında danışılan bu fəaliyyət işğaldan azad edilmiş rayonlarımızın sakinlərinin ən müasir standartlara uyğun şəkildə bərpa olunan infrastruktura malik ərazilərə Böyük Qayıdış tarixini günbəgün yaxınlaşdırır.
Postmüharibə dövrünün ən müsbət məqamlarından biri də Azərbaycan dövlətinin öz canları və sağlamlıqları bahasına xalqımıza böyük Zəfər bəxş etmiş Şəhidlərimizin ailələrinə və Qazilərimizə göstərdiyi qayğı və diqqətdir. Sizin müvafiq sərəncamlarınız və birbaşa göstərişləriniz əsasında bu kateqoriyaya aid vətəndaşlarımızın sosial problemlərinin həlli, konkret desək, onların ayrı-ayrılıqda mənzil və işlə təmin olunmaları, o cümlədən, sağlamlıqlarının bərpası üçün zəruri addımlar atılır, Dövlət-Xalq birliyi bu son dərəcə həssas məsələdə də özünü qabarıq göstərir. Bu prosesdə müəyyən məmur səhlənkarlığı qeydə alınsa da, Şəhid ailələri və Qazilərimizin problemlərinin kompleks qaydada həll olunacağına cəmiyyətdə dərin inam mövcuddur. İndiyə qədər on minlərlə Şəhid ailəsi ilə Qazinin mənzillə təmin olunması bu prosesin uğurla yekunlaşdırılacağına yönəlik inamı daha da artırır.
Cənab Prezident!
Dövlət başçısı postuna gəlişinizdən sonra Azərbaycan dövlətinin üzləşdiyi problemlərə və beynəlxalq şəraitin mürəkkəbliyinə baxmayaraq, ölkə mediasının inkişafına, həmçinin jurnalistlərin sosial vəziyyətinin normallaşdırılması istiqamətində atdığınız ardıcıl addımlar KİV nümayəndələri tərəfindən dərin rəğbətlə qarşılanıb. Jurnalistlərin mənzil şəraitinin yaxşılaşdırılması üçün Sizin 2010-cu il iyulun 22-də imzaladığınız “Azərbaycan mətbuat işçilərinin sosial müdafiəsinin gücləndirilməsi tədbirləri haqqında”, 2013-cu il iyulun 22-də imzaladığınız “Azərbaycan mətbuat işçilərinin sosial müdafiəsinin gücləndirilməsinə dair əlavə tədbirlər haqqında” və 2017-ci il iyulun 19-da imzaladığınız “Kütləvi informasiya vasitələri əməkdaşlarının sosial müdafiəsinin gücləndirilməsi ilə bağlı əlavə tədbirlər haqqında” sərəncamlara uyğun olaraq, ümumilikdə 410 jurnalist mənzillə təmin olunub.
Sizin yuxarıda qeyd olunan 19 iyul 2017-ci il tarixli Sərəncamınız əsasında jurnalistlər üçün inşa olunan 255 mənzillik 3-cü binanın tikintisi 2020-ci ilin yayında başa çatdırılıb. Lakin inşaat zamanı keyfiyyətsiz tikinti materiallarından istifadə edildiyi əsas gətirilərək binanın təhvil alınması yubadıldı. 2020-ci ilin iyulunda məlum Tovuz döyüşlərinin, həmin il sentyabrın 27-də isə 44 günlük Vətən müharibəsinin başlaması jurnalistlər üçün inşa olunan binadakı mənzillərin təyinatı üzrə paylanmasını arxa plana keçirdi. Lakin 2021-ci ilin iyul ayından etibarən, jurnalistlərin 3-cü binası ətrafında yol verilən aşkar spekulyasiyalar KİV nümayəndələrində ciddi narahatlıqla qarşılanıb. Çox təəssüflə bildiririk ki, vurğulanan spekulyasının başlıca motivi jurnalistlərlə Şəhid ailələri və Qaziləri üz-üzə gətirmək, nəticədə ölkə başçısı olaraq Sizin və Dövlətin nüfuzuna zərbə vurmaqdır. Yenə də təəssüflə qeyd edirik ki, bu spekulyasiyada vaxtilə jurnalistlərin 1-ci və 2-ci binalarından mənzil almış bəzi “həmkar”larımız da yer almaqdadırlar. Ancaq təbii ki, onlar bu məsələdə sadəcə, icraçı funksiyasını yerinə yetirirlər.
Cənab Prezident!
Ölkə jurnalistləri Azərbaycan dövlətinin Şəhid ailələri və Qazilərimizin sosial problemlərinin həlli, o cümlədən, onların mənzillə təmin olunmaları üçün bütün imkanlara malik olduğuna birmənalı inanırlar. KİV nümayəndələri əmindirlər ki, dövlətimiz jurnalistlər üçün inşa olunmuş 3-cü binanın təyinatını dəyişdirmədən də bu məsələni həll etmək qüdrətindədir. Müraciətimizdə qeyd olunan bütün bu məqamları nəzərə alaraq, Sizin müvafiq Sərəncamınız əsasında jurnalistlər üçün inşa edilmiş 3-cü binanın təyinatı ilə bağlı səngiməyən spekulyasiyalara son qoymaq, eyni zamanda, çox sayda media mənsubunun mənzil sahibi olmaq arzusunu gerçəkləşdirmək üçün həmin binadakı mənzillərin nəhayət bu il KİV nümayəndələrinə paylanılmasının təmin olunmasına göstəriş verməyinizi xahiş edirik. İnanırıq ki, bu müraciətimizə hər zaman olduğu kimi yenə də həssaslıqla yanaşacaq və sözügedən binadakı mənzillərin illərlə xoş xəbər gözləyən jurnalistlərə hədiyyə olunmasını təmin edəcəksiniz.
Sizə dərin hörmətlə:
1. Rəsul Mirhəşimli - Avropa.info xəbər portalının baş redaktoru, Qarabağ müharibəsi veteranı
2. Araz Zeynalov - Yenicag.az saytı
Qeyd: Müraciətə imza atmaq istəyən jurnalistlər rəy bölümündə ad, soyadını və işlədiyi media qurumunun adını qeyd etməklə müraciətə qoşula bilər.
Qeyd edim ki, müraciəti əvvəlki iki binada mənzil almış jurnalistlər də imzalaya bilərlər.
https://www.facebook.com/PresidentIlhamAliyev