\
12 gündən sonra - fevral ayının 9-da ölkədə növbədənkənar parlament seçkiləri keçiriləcək. Bu, həm də o deməkdir ki, yaxın günlərdə hazırkı millət vəkillərinin səlahiyyət müddəti başa çatacaq.
FED.az xəbər verir ki, Azərbaycanın tarixində ilk dəfə olaraq Milli Məclisin buraxılması haqqında qərar qəbul edən hazırkı millət vəkillərinin bir-çoxunun övladları və yaxın qohumları müxtəlif sahələrdə yüksək vəzifə tutmaları ilə yadda qalıb.
Yaxın günlərdə millət vəkili statusunu itirəcək deputatların yüksək vəzifələrdə işləyən övladlarının və yaxınlarının siyahısını təqdim edirik:
- Millət vəkili, AMEA-nın vitse-prezidenti İsa Həbibbəylinin oğlanlarından biri - Ərəstü Həbibbəyli Baş nazirin Katibliyinin rəisi, digər oğlu Səhət Həbibbəyli isə Naxçıvan Muxtar Respublikası Dövlət Gömrük Komitəsinin sədridir.
- Milli Məclisin üzvü, Azərbaycan Həmkarlar İttifaqı Konfederasiyasının rəhbəri olan Səttar Möhbalıyevin oğlu və eyni zamanda da bu yaxınlarda vəzifədən azad olunan Prezidentin köməkçisi Əli Həsənovun kürəkəni - İsfəndiyar Möhbalıyev Xəzər rayonu Polis İdarəsinin rəisidir.
- Millət vəkili Aqil Abbasın oğlu - Tuncay Abbasov Suraxanı Rayon Polis İdarəsinin 30-cu bölməsinin rəisidir.
- Deputat Elman Məmmədovun oğlu - polkovnik-leytenantı Elşad Məmmədov Baş Dövlət Yol Polisi İdarəsinin Avtomobillərin Texniki Müayinə Mərkəzinin rəisidir.
- Millət vəkili, Azərbaycan Sosial Rifah Partiyasının sədri Xanhüseyn Kazımlının oğlu Fəxri Kazımov Azərbaycan İpoteka və Kredit Zəmanət Fondunun İdarə Heyətinin sədridir.
- Millət vəkili, Şuşa Rayon İcra Hakimiyyətinin başçısı Bayram Səfərovun oğlu - Xəlil Bayramov Xətai rayon 34-cü Polis Bölməsinin rəisidir.
- Deputat Çingiz Qənizadənin oğlu - Elgiz Qənizadə Binəqədi rayon prokurorunun müavinidir.
- Deputat Flora Qasımovanın oğlu - polis polkovniki Elsevər Mirzəyev Daxili İşlər Nazirliyinin Baş Kadrlar İdarəsinin rəis müavinidir.
- Millət vəkili Sahib Alıyevin qardaşı - Bayram Alıyev Nərimanov rayon Polis İdarəsinin 18-ci polis bölməsinin rəisidir.
- Milli Məclisin üzvü Vahid Əhmədovun oğlu - Zəfər Əhmədov Qaradağ rayonunun prokurorudur.
- Deputat İmamverdi İsmayılovun oğlu - polis mayoru İlkin İsmayılov Sumqayıt Şəhər Yol polisinin imtahan-qeydiyyat şöbəsinin rəisidir.
- Millət vəkili Hüseynbala Mirələmovun oğlu - polis-polkovniki Fərid Mirələmov Xəzər Rayon Polis İdarəsinin 3-cü Polis Bölməsinin rəisi olub.
- Deputat Ziyad Səmədzadənin oğlu Elşad Səmədzadə Azərbaycan İqtisadçılar İttifaqının sədr müavinidir. Böyük qızı Aygün Səmədzadə tanınmış bəstəkardır. Kiçik qızı Aytən Səmədzadə isə "İqtisadiyyat" qəzetinin baş redaktorudur.
- Millət vəkili, Xalqa artisti Zeynəb Xanlarovanın oğlu Ramin Babayev Standarlaşma, Metrologiya və Patent üzrə Dövlət Komitəsinin sədr müavini olub.
- Millət vəkili, Azərbaycan Dövlət Neft Şirkətinin (SOCAR) prezidenti Rövnəq Abdullayevin oğlu Rəşad Abdullayev "Səbail" Futbol Klubunun Müşahidə Şurasının sədri olub.
- Millət vəkili Əhliman Əmiraslanovun oğlu Tapdıq Əmiraslanov da Fövqəladə Hallar Nazirliyində müavin vəzifəsində işləyir.
- Millət vəkili, Naxçıvan Muxtar Respublikası Ali Məclisinin sədri Vasif Talıbovun oğlanlarından biri Seymur Talıbov Naxçıvan Dövlət Universitetində prorektor, digər oğlu Rza Talıbov isə Dövlət Miqrasiya Xidmətində idarə rəisi vəzifəsində çalışır.
- Millət vəkili, "Azərbaycan Dəmir Yolları" QSC-nin sədri Cavid Qurbanovun qardaşı Şəhriyar Şəmşirli Abşeron Rayon Polis idarəsinin rəisidir.
Yeniavaz
