Ermənistan XİN rəhbəri Zöhrab Mnatsakanyan Azərbaycan torpaqlarının işğaldan azad edilməsi üçün aparılan Vətən müharibəsi nəticəsində Qarabağdan Ermənistana gedən ermənilərin sayı haqda danışıb.
TV 713.az xəbər verir ki, Z.Mnatsakanyan indiyə qədər 90 min erməninin Ermənistana qaçdığını deyib.
Mnatsakanyan bununla da kifayətənməyib, Qarabağda “8 min obyektin dağıldığını” iddia edib.
Bu, əlbəttə ki, növbəti erməni yalanından başqa bir şey deyil. Qarabağda ümumilikdə 139 min əhalinin yaşadığı haqda rəsmi məlumatın əksinə olaraq, burada 27 sentyabr 2020-ci ilə qədər cəmi 60 min nəfərin olduğu Ermənistanın qeyri-hökumət təşkilatlarının hesabatlarında əksini tapmışdı. Buna görə də 90 min qaçqın üçün Qarabağdakı ermənilərin ən azı “iki dəfə qaçması" lazımdır.
Və yaxud Mnatsakanyan Qarabağda döyüşlərdən qaçan Ermənistan vətəndaşı olan əsgərləri qaçqın kimi qeydə almaqla məşğuldur.
Digər tərəfdən, Qarabağda işğaldan azad edilən ərazilərdə daşı-daş üstündə qoymayan ermənilərin nazirinin “8 min obyektin” dağılmasından danışması sadəcə riyakarlığın son həddidir. Hadrutun azad olunmasından sonra ordan yayılan görüntülərdən də göründü ki, Azərbaycan Ordusu mülki obyektlərə zərər yetirmir. Bunu Şuşanın və Xankəndinin işğaldan azad olunduğu görüntülərində də mütləq müşahidə edəcəyik.
Azərbaycan özünə məxsus olan şəhərləri vurmur, Azərbaycan Ordusu yalnız işğalçı ordusunun hərbi məntəqələrinə və zirehli texnikasına zərbə endirir, işğalçı qüvvələri məhv edir.
Mümkündür ki, Z.Mnatsakanyan “8 min obyekt” deyəndə 8 min hərbi obyekti nəzərdə tutub. Çünki Ermənistan 30 ildə Qarabağda bina və infrastruktur deyil, qarış-qarış yalnız səngər qazıb, hərbi məntəqələr, postlar qurmaqla məşğul olub. Təsadüfi deyil ki, Zəngilan şəhəri azad edilərkən Azərbaycan bayrağını ucaltmaq üçün bir salamat binanın tapılmadığını Prezident, Ali Baş Komandanımız İlham Əliyev bildirdi.
Bu baxımdan hərbi obyektlərdən 8 mininin artıq məhv edildiyi şübhə doğurmur. Buna inanmaq üçünsə Azərbaycan Müdafiə Nazirliyinin düşmənin hərbi obyektlərinə endirilən zərbələri əks etdirən görüntülərə baxmaq kifayətdir.
Xatırladaq ki, Ermənistanın Qarabağı işğalı nəticəsində 1992-93-cü illərdə bu ərazilərdən 800 min azərbaycanlı məcburi köçkünə çevrilib. Ermənistandan 1988-ci ildə qovulan azərbaycanlıların sayı isə 250 mindən çoxdur.
