Dağlıq Qarababağda 2022-ci ilin mart ayına qədər yerli özünüidarə strukturlarına heç bir "seçki" keçirilməyəcək.
Tv 713.az Musavat.com-a istinadla xəbər verir ki, Xankəndidəki terrorçu xuntanın rəhbərliyinin yaydığı bəyanatlara görə, "hərbi vəziyyətin qüvvədə olmasını nəzərə alaraq yerli özünüidarə strukturlarına, yəni bələdiyyələrə seçkilərin iki il müddətinə təxirə salınmasına" qərar verilib.
Bununla bağlı "fərmanı" Xankəndidəki keçmiş və qondarma "xunta"nın cinayətkar lideri Araik Arutyunyan "imzalayıb".
Qarabağda hazırda Rusiyanın sülhməramlı missiyasının nəzarətində olan ərazilərdə mövcud olan yerli özünüidarə strukturlarının "səlahiyyətləri" yeni seçkilərdən sonra heyəti müəyyənləşəcək bələdiyyə qurumlarının ilk iclasına qədər uzadılır. İcma rəhbəri və ya ağsaqqallar şurası üzvünün səlahiyyətlərinin vaxtından əvvəl başa çatması, ya da çatdırılması halında onun yerinə səlahiyyətləri müvəqqəti icra edən şəxs təyin ediləcək.
Dağlıq Qarabağdakı separatçı rejimin rəhbərliyinin bu qərarı Ermənistanda və xarici ölkələrdəki erməni diaspor təşkilatlarında şok effekti yaradıb. Daha doğrusu, erməni diasporunun funksionerləri və struktur rəhbərlərinin reaksiyalarını bir ifadə ilə səciyyələndirmək olar:
"İnana bilmirik, Xankəndi Bakıya tabe olmağa başlayır".
Bu sözlər ABŞ-dakı erməni icmasının tanımış üzvlərindən biri Artaşes Poqosyana məxsusdur.
"Araik Arutyunyanın davranışından onsuz da şübhələnirdik. Onun İkinci Qarabağ müharibəsindəki bəyanatları, açıqlamaları və ən başlıcası, göstərişləri həddən ziyadə qarışıqdı. İndisə yerli özünüidarə orqanlarına seçkilər iki il müddətinə təxirə salındı. Buna inana bilmirəm. Sanki qarabağlı ermənilərin taleyi Bakıya tapşırılır. Deyəsən, Ermənistan rəhbərliyi ilə Bakı arasında yeni, ictimaiyyətə açıqlanmayan razılaşma var. Araik Arutyunyan da bu razılaşmaya əsasən davranır. Əks təqdirdə belə inanılmaz, yaramaz, qorxaq qərar verilməzdi", - A.Poqosyan deyib.
Erməni mediası və ekspertlər onu da vurğulayırlar ki, Dağlıq Qarabağda seçkilərin iki il müddətinə təxirə salınması ilə bağlı qərar Xankəndidə Araik Arutyunyanın Azərbaycanın rəsmi nümayəndəsi ilə görüşündən sonra verilib.
Həmin görüşdə Ermənistan Milli Təhlükəsizlik Xidmətinin sədri Armen Abazyan və Rusiyanın Qarabağdakı sülhməramlı kontigentinin komandanı, general-leytenant Rüstəm Muradov da iştirak edirdi.
Görüşün təfərrüatı, müzakirə edilən məsələlər barədə geniş açıqlama verilməyib, sadəcə, belə bəyanat yayılıb: "Görüş zamanı itkin düşənlərin axtarışı, əsirlərin qaytarılması və humanitar xarakterli digər məsələlər müzakirə olunub. Söhbət 1990-cı illərdəki hərbi əməliyyatlardan sonra taleyi naməlum olan insanlardan gedir".
Xatırladaq ki, bu bəyanat yayılandan az sonra sosial şəbəkələrin Azərbaycan seqmentində qeyzli və qəzəbli açıqlamalar, statuslar sıralandı ki, bəs Azərbaycanın rəsmi şəxsləri niyə rəsmi Bakının hərbi cinayətkar elan etdiyi və axtarışa verdiyi Araik Arutyunyanla görüşüblər.
Araik Arutyunyanın siyasi perspektivlərinə gəldikdə isə, Dağlıq Qarabağdakı separatçı rejimin rəhbərliyi dəyişəcək. Hərbi cinayətlərdə əli olmayan neytral adamların xuntanın rəhbərliyində təmsil olunacaqları şübhə doğurmur, çünki qarabağlı ermənilər "status" ilğımının artıq puç olduğunu anlayırlar.
