ABŞ Hərbi Hava Qüvvələrinin “B-2 Spirit” strateji “görünməz” bombardmançısını idarə etmək hüququna malik pilotların sayı dünyada cəmi 80-120 nəfər arasındadır.
Tv713.az Globalinfo.az-a istinadla xəbər verir ki, bu barədə “Wionews” məlumat yayıb.
Bildirilir ki, bunun əsas səbəbi ABŞ Hərbi Hava Qüvvələrinin arsenalında cəmi 20 ədəd “B-2 Spirit” təyyarəsinin olmasıdır. Bu təyyarələrin hamısı eyni aviabazada yerləşir və hər biri üçün orta hesabla 2-3 ekipaj hazırlanır. Nəticədə aktiv B-2 pilotlarının ümumi sayı təxminən 100 nəfər təşkil edir.
Məlumata görə, B-2 pilotu olmaq üçün könüllü müraciət etmək mümkün deyil. Namizədlər illərlə xidmət etdikdən sonra ABŞ Hərbi Hava Qüvvələri tərəfindən seçilir. Seçim zamanı yalnız uçuş bacarığı deyil, həm də intizam, liderlik keyfiyyətləri, qərarvermə qabiliyyəti və komandanlığın etimadı nəzərə alınır.
Ən çox şans strateji “B-52 Stratofortress” və “B-1B Lancer” bombardmançılarında böyük təcrübəyə malik pilotlara verilir. Qırıcı təyyarə pilotlarının isə bu proqrama qəbul olunması daha nadir hallarda baş verir.
Seçilən namizədlər Missuri ştatındakı Uaytmen aviabazasında təxminən bir il davam edən xüsusi hazırlıq keçirlər. Təlim zamanı “uçan qanad” tipli təyyarənin idarə olunması, elektron idarəetmə sistemi, radar və silah sistemləri, aşağı görünmə texnologiyaları, eləcə də nüvə silahı ilə missiyaların icrası öyrədilir.
Qeyd olunur ki, hər bir “B-2 Spirit” bombardmançısının dəyəri 2 milyard dollardan çoxdur. Bu səbəbdən pilotlar mütəmadi olaraq uçuşlar həyata keçirməli, ixtisaslarını təsdiqləməli və davamlı yoxlamalardan keçməlidirlər. Keçmiş B-2 pilotlarının sözlərinə görə, bu təyyarəni idarə etmək yüksək psixoloji məsuliyyət tələb edir, çünki hər bir bombardmançı ABŞ-nin strateji potensialının əvəzolunmaz elementi hesab olunur.
