İGİD TEYMURLU
VƏ "YENİ DÜNYA DÜZƏNİ"NDƏ VAROLUŞUMUZ
Milli Məclis kimi tanınan orqanın "deputatları"ndan biri olan, jurnalist ELÇİN MİRZƏBƏYLİ özünün son yazılarından birində "azərbaycançı olmaq” çağırışını dilə gətirir. Bunu dolayı yolla həm də "yeni dünya düzəni"nin bir tələbi kimi ortaya qoyur. Və sonuc olaraq "vəssalam" da söyləyib öz QÜDRƏTİnin əslində nəyin və kimin sayəsində təcəlla etməsini ortaya qoyur..
Elçin bəy bu konuda Ayaz Salayev kimi ət və sümükdən ibarət varlıqların "millətinin taleyinə bağlılığını, milli identikliyin yüksəlməsi nümunəsi" kimi əlaqələndirici vasitələrdən də istifadə edir...
Hes zad!
KÜL O MİLLƏTİN BAŞINA OLUR Kİ, "MİLLİ İDENTİKLİYİNİN NÜMUNƏSİ" Ayazsalayevlərdir!
VƏ KÜL O MİLLƏTİN BAŞINA OLUR Kİ, məhz belə düşüncəyə, belə yanaşma tərzinə üstünlük verən elcinmirzəbəylilərkimilərə "millət vəkili" statusu verilməsinin obyekti olub və olur!
Elçin bəyin təqdimatı elə rus təfəkkürünə söykənərək ivanların qarşısında dərhal pencəyini düyünləyərək özünə və sözünə düzən verən Sahibə Qafarova deputatxanasının düşüncəsinin məhsuludur, sadəcə olaraq alt qata enən imza Elçin Mirzəbəylinindir.
Adam bir yandan "yeni dünya düzəni"ndən danışır, başqa bir yandan da varoluşumuzda milli kimliyimiz formatında "azərbaycançılığı" oturaq hala gətirməklə guya ki, çıxış yolunu göstərib "vəssalam!" deyir...
Əslində Mirzəbəyli bu "vəssalam"la öz aləmində hansısa QÜDRƏTi təqdim edir. Və bu qüdrətin böyüklüyü də elçinlərə verilən aZADLIQLAR qədərindədir.
Mirzəbəyli kimiləri bəsləyib, ona təkan verərək Azərbaycanın siyasi düzəninə ötürənlərin özləri də bu konuda ən azından Mirzəbəyli qədər yükümlüdürlər - genəlliklə həmrəylik və bütövlük cəbhəsinin liderləri.
Ay sənin həmrəyliyinə də, bütövlüyünə də, "vəssalam"ına da .... daha bir müddət üçün deputat mandatı ərmağan olsun, Elçin Mirzəbəyli!..
Azərbaycan adlı məmləkətin vətəndaşı olmaqdan hər birimiz qürur duyuruq - türkümüz də, talışımız da, ləzgimiz də.. Və zatən toplum olaraq biz hamımız Elçin bəyin dediyi kimi "azərbaycançı"(bu da Elçin bəyin dilimizə sevgisindən yaranıb) yıq! Özü də bütün müstəvilərdə Azərbaycana can fəda edənlərdənik. Daha bu kateqoriya insanlardan fərqli olaraq bizlər təkcə söz meydanının cəngavərləri deyilik. Həmrəyliyə, Bütövlüyə söykənib BÜT EVLƏRə tapınanlardan, Büt Evlərə sığınanlardan deyilik!.
Mənim MİLLİ KİMLİYİM TÜRKDÜRsə və türkdür də, sən necə mənə Stalinsayağ "azərbaycanlı" deyə bilərsən?!
Və sən necə Ayazsalayevləri mənə "milli identikliyin nümunəsi" olaraq təqdim edirsən?!
Öz ana dilinə, öz Konstitusiyasına xor baxan ayazsalayevlər necə "milli identikliyin nümunəsi" ola bilər?!
Retro düşüncəli Ayazsalayevlər hələ də sovet dönəminin milli kimliyə, ana dilinə olan münasibətdə basqı rejimininin təsiri altında yaşamaqdadılar. Çünki sovet dönəmində milli kimliyimizə, ana dilimizə xor baxanlar, qənim kəsilənlər, özgə çətiri altında gizlənənlər yaşayırdılar. Bax indi də bizim ÖZÜMÜZƏ QAYIDIŞ MÜCADİLƏMİZ ayazları belə demək mümkünsə, narahat edir və "qavari pa çeloveçeski" deməyə üstünlük verirlər. Bu millətə sənin kimi MİRZƏlik etmək istəyən BƏYlərin ÇƏNlərini də ELin deyil, rus təfəkkürlü Qafarova deputatxanasının arxından gələn sular doldurduğu üçün sən də salayevləri "milli identikliyin nümunəsi" olaraq görür və buna lətifəsi səndən uzaq dəvənin ot sevgisiylə haqq qazandırırsan. Mirzəbəyli, dəvəni qayadan uçurdan bir çəngə otdur. Allah kəssin o ot həvəsi deyilən nəmənəni...
Sənin "milli identikliyin nünunəsi" saydığın ayaz salayevin özünün dediyinə görə "həyatda ən böyük uğuru" "təhsilini rus dilində və Rusiyada alması"dır. Bizim qanımıza yerikləyən və bizim dilimizə tüpürən Rusiyadan və rus dilindən söhbət gedir haaa, Mirzəbəyli!!!!
Öyləsə və öylədir də, Salayevin bu "identikliyi"nin Azərbaycanın varoluşunda nə əhəmiyyəti var, Mirzəbəyli Elçin?
Yox Sizlərə milli kimliyimiz, dilimiz, dinimiz, tariximizlə bağlı eybəcər kodekslərin cəmiyyətə sırınması kontekstində verilən siqnallar bundan ibarərdirsə, özünüzü yormayın! Artıq zaman o zaman deyil. Çalxalanan zamanın nehrəsinin "yağı yağ üstə çıxır, ayranı ayranlıq olur" həqiqəti apaydın tam ortalıqda. Düşüncələrini belə mədə niyyətinə qurban verənlər başqasından da öncə elə öz dillərilə ifşa olunur - bax elə sənin kimi, Elçin Mirzəbəyli.
"Yeni dünya düzəni"ndə bizim nicatımız VƏTƏNDAŞ HƏMRƏYLİYİNDƏ VƏ TÜRK DÜNYASI İLƏ BİRLİYİMİZDƏDİR, Elçin Mirzəbəyli! Bu mənada ortaq coğrafiyanı bölüşən biz türklər "yeni dünya düzəni"ndəki həmlələrdən qorunmaq, ayaq üstə qalmağı istəyiriksə və istəyirik də, hər şeydən öncə Türk Dövlətləri Təşkilatının mövcudluğunu, yaşamağını təmin etmək üçün bütün sipərləri aşmalı, Azərbaycanın bu təşkilata töhvəsini qürurla təmin etməli, iqtisadi, siyasi, ideoloji müstəvidə öz türk kimliyimizi ortaya qoymaqla dilimizi, dinimizi, birliyimizi yaşatmalıyıq. Ayazkimilər fəsiləsindən olanların daha münbit şəraitdə cücərmələri üçün sənin kimi siyasi aqronomların tövsiyyəsi bu mənada tam yararsızdır, Elçin Mirzəbəyli!..
Bunu son 44 günlük müharibədə də gördük ki, ətrafımızda baş verənləri dəyərləndirmənin sadə bir düsturu heç də sən deyən kimi təkcə "azərbaycançı olmaq" deyilmiş. Sən hansı orqanı təmsil edirsən, fərqindəsənmi? Ətrafımızda hürüşən itləri mədə niyyətinə görə görməzdən gəlməyin adı elə sən deyəndir. Çalxalanan dünyada 400 milyonluq Türk Dünyasının coğrafi mənada bir olmasına zaman imkan verməsə də, ancaq iqtisadi və siyasi müstəvidə DƏMİR YUMRUQ olmamız günün zərurətidir. Və sənin kimi "deputatlar" da hər şeydən öncə bax bunu - DİLDƏ, FİKİRDƏ, ƏMƏLDƏ BİRLİYİ təblığ etməlisiniz. Daha özünüzə örnək sandığınız rus təfəkkürlü ayazlardan matah qayırıb, "vəssalam" ifadəsilə milli identikliyimizə sınır cızmaq sənin Qüdrətin xaricindədir. Hər kəs kafasına vurmalı ki, yeni dünya düzənində Azərbaycanımızın varoluşu Dildə, Fikirdə, Əməldə Birliyə söykənən Türkün Oyanışı, Türkün Dirilişindən keçir, hansısa çətir altında gizlənmədən yox....
