Şri-Lanka hökuməti ölkə ərazisində feysbuk, vatsap və viberə girişə yenidən məhdudiyyət tətbiq edib.
Beş.az "Qafqazinfo"ya istinadən verdiyi xəbərə görə, qərar müsəlmanlara qarşı təcavüz və hücum hadisələrinin artması fonunda qəbul edilib. Belə ki, naməlum şəxslər mayın 12-də Çilau şəhərinin qərb sahilində yerləşən məscid və müsəlmanlara məxsus mağazalara daşla hücum ediblər. Münaqişəyə səbəb feysbukda xristianlarla müsəlmanlar arasında baş vermiş söz atışması olub.
Xatırladaq ki, aprelin 21-də Şri-Lankada baş vermiş 8 partlayışda 40-dan çoxu xarici vətəndaş olmaqla 253 nəfər ölüb, 521 nəfər yaralanıb. Həmin gün respublika rəhbərliyi sosial şəbəkələrdən istifadəni 10 gün müddətinə-21-30 aprel tarixlərində qadağan edib.
