NƏSİMAN YAQUBLU
Böyük mütəfəkkir Ü.Hacıbəylinin yazılarında dəyərli bir fikir də səslənir:”Bu vətən bizimdir!”.
Ermənilərin işğalçı siyasətinə ən gözəl cavab da elə bu sözlərdir-“Bu vətən bizimdir!”. Deyəsən erməni işğalçıları və ictimaiyyəti də bu fikrin gerçəkliyinə getdikcə daha çox inanmağa başlayır.Ermənilər bir faktın da reallığı ilə barışmaq məcburiyyətindədir- iqtidarlı, müxalifətli hər bir vətəndaşımız ordumuzun yanındadır və onun zəfərlərinə dəstək verir.Erməniləri sarsıdan ordumuzun vurduğu sarsıdıcı zərbələrlə yanaşı, həm də vətəndaşla hakimiyyətin, vətəndaşla dövlətin bir güc halında birləşib yeganə hədəf olan erməni işğalçılarına qarşı mücadiləsidir.Bu gün doğma Qarabağımızın işğal altında qalması tarixinin 30 ilə yaxın bir müddət olduğunu və bundan təbii ki üzüldüyümüzü bildiririk.
Gerçəkdir ki, bu uzun bir müddəti əhatə edən tarixdir.Lakin unutmamalıyıq ki, tarixdə bir çox xalqların da tarixində “30 – 40 illik” işğal tarixləri olub və bu toplumlar bəzən sonda qələbə əldə etməyi bacarıblar.Sadəcə onlar ruhdan düşmədən və tarixi məqamı dəyərləndirərək bu uğura imza atıblar.Diqqət edək - Polşa xalqı uzun illər müddətindəki müstəqillik mücadiləsində sonda uğur qazandı. Böyük dövr ərzində Rusiya işğalında qalan polyaklar nəhayət ki, 1918- ci ilin noyabrında uzun müddətli mücadilələrindən və məşhur üsyanlarından sonra istiqlal əldə edib Polşa Respublikasını yaratdılar. Polşanın görkəmli dövlət xadimi Marşal Pilsudski yazırdı: “Məğlub olub da ruhdan düşməmək – bax bu ən böyük qələbədir”.
Düşünürük ki, Azərbaycan xalqı da işğalın 30 ilə yaxın bir müddəti əhatə etməsinə baxmayaraq qələbə əzmini itirmədi və məqamında hərəkətə keçib torpaqlarını işğaldan azad etməyə başladı.
Belə taleyi başqa formada alman xalqı da yaşadı.40 ildən çox Almaniya ikiyə bölünsə də öz qətiyyətini itirmədi və bütövlüyü uğrunda mücadilə apardı, sonda birləşib vahid Almaniya dövləti kimi mövcudluğunu qoruyub saxladı.
Bu gün Azərbaycan xalqı da eyni taleyi yaşamaqdadır.Xalqımızın qətiyyətli mövqeyi, ordumuzun gücü erməniləri tezliklə məcbur edəcək ki, işğal edilmiş torpaqlarımızdan uzaqlaşsınlar və Qarabağda Üçfəngli bayrağımız dalğalansın! O gün uzaqda deyil
